அண்டம் மற்றும் விண்வெளி

பிரபஞ்சத்தின் தோற்றம் – பெரு வெடிப்புக் கோட்பாடு

எல்லா விண்மீன் திரள்களும் நம்மிடமிருந்து விலகிச் செல்வது போலத் தோன்றின; தொலைவில் உள்ளவை விரைவாக நகர்வது போல் தெரிந்தன. விஞ்ஞானிகள் கடந்த காலத்தில் இவை அனைத்தும் ஒரு புள்ளியாகவே இருந்தன என்றும், பின்னர் விரிவடையத் தொடங்கின என்றும் கருதுகின்றனர்.

இவ்வாறு ஒரு புள்ளியில் பருப்பொருள் குவிந்து அங்கிருந்து விரிவடையத் தொடங்கிய நிகழ்வு பெரு வெடிப்பு (Big Bang) என அழைக்கப்படுகிறது. இதுவே நாம் இன்று காணும் பிரபஞ்சத்தின் தோற்றமாகக் கருதப்படுகிறது. சுமார் 14 பில்லியன் ஆண்டுகளுக்கு முன்பு பிரபஞ்சம் வெளிப்பட்டது.

பிரபஞ்சம் வெளிப்பட்ட போது நேரம், வெளி மற்றும் பருப்பொருள்கள் அனைத்தும் இந்த பெரு வெடிப்பிலிருந்தே தொடங்கின. 300,000 ஆண்டுகளுக்குப் பிறகு பிரபஞ்சம் குளிர்ச்சியடைந்து ஹைட்ரஜன் மற்றும் ஹீலியம் வாயுக்களால் ஆன கூட்டமாக இருந்தது. இந்த வாயுக்களில் இருந்தே முதல் நட்சத்திரங்களும் விண்மீன் திரள்களும் உருவாயின.

புவி மையக் கோட்பாடும் சூரிய மையக் கோட்பாடும்

நம் முன்னோர்கள் பூமியை மையமாகக் கொண்டு சூரியன், சந்திரன் மற்றும் மற்ற கோள்கள் சுற்றி வருகின்றன என்று கருதினர். இது புவி மையக் கோட்பாடு எனப்படும். கிரேக்க ரோமானிய கணிதவியலாளர் தாலமி (கி.பி. 2ம் நூற்றாண்டு) இதை வரையறுத்தார்.

போலந்து நாட்டு வானியலாளர் நிக்கோலஸ் கோப்பர்நிக்கஸ் சூரியனை மையமாகக் கொண்டு பூமியும் மற்ற கோள்களும் சுற்றி வருகின்றன என்று கூறினார். இது சூரிய மையக் கோட்பாடு ஆகும். கலிலியோ தொலைநோக்கி மூலம் வெள்ளிக்கோளை உற்று நோக்கி சூரிய மையக் கோட்பாட்டிற்கு நிரூபணம் அளித்தார்.

நிலவின் பல்வேறு நிலைகள்

நிலவு பூமியை 27 நாட்களில் ஒரு முறை சுற்றி வருகிறது. சூரியன் ஒளியின் ஆதாரம் ஆகும்; நிலவு சூரிய ஒளியை எதிரொளிக்கிறது. பூமிக்கும் சூரியனுக்கும் இடையில் நிலவு வரும் போது நமக்கு அமாவாசை தெரியும். பூமிக்குப் பின்னால் நிலவு இருக்கும் போது பெளர்ணமி தெரியும்.

நிலவின் நிலை	பெயர்	சிறப்பம்சம்
வளர்பிறைக் காலம்	முதல் கால் பாகம்	ஒளி வளர்ந்துகொண்டே இருக்கும்
தேய்பிறைக் காலம்	மூன்றாம் கால் பாகம்	ஒளி குறைந்துகொண்டே இருக்கும்
பூரண நிலவு	பெளர்ணமி	நிலவு முழுவதும் ஒளிரும்
இருண்ட நிலவு	அமாவாசை	நிலவு தெரியாது

விண்மீன் திரள்கள்

ஈர்ப்பு விசையால் சேர்க்கப்பட்ட விண்மீன்கள் அல்லது விண்மீன் குழுக்கள் மற்றும் விண்வெளிப் பொருள்களின் ஒரு பெரிய தொகுப்பே விண்மீன் திரள் ஆகும். பிரபஞ்சத்தில் கோடிக்கணக்கான விண்மீன் திரள்கள் உள்ளன.

பெரும்பாலான விண்மீன் திரள்களின் விட்டம் ஆயிரம் முதல் பத்து ஆயிரம் விண்ணியல் ஆரம் வரை உள்ளது.

விண்மீன் திரள்களின் வகைகள்

வகை	சிறப்பியல்பு
சுருள் விண்மீன் திரள்	நட்சத்திரங்கள், வாயு மற்றும் தூசி கொண்ட தட்டையான சுழலும் வட்டு; மையத்தில் நட்சத்திரச் செறிவு காணப்படும்; புதிய நட்சத்திரங்கள் நிறைந்தவை
நீள்வட்ட விண்மீன் திரள்	ஏறத்தாழ நீள்வட்ட வடிவம்; மையத்தில் சீரற்ற சுற்றுப்பாதையில் விண்மீன்கள்; வயதான நட்சத்திரங்களை உள்ளடக்கியவை
ஒழுங்கற்ற விண்மீன் திரள்	ஒழுங்கான அமைப்பு இல்லாதவை; ஏராளமான வாயு மற்றும் தூசி கொண்டவை; கண்டுபிடிக்கப்பட்ட விண்மீன் திரள்களில் கால் பங்கு இவையே
கோடிட்ட சுருள் விண்மீன் திரள்	விண்மீன்களாலான குறுக்குக் கோடு கொண்ட சுருள் திரள்; நமது பால்வெளித்திரள் இந்த வகையைச் சேர்ந்தது

பால்வெளித் திரள்

நமது சூரிய மண்டலத்தை உள்ளடக்கிய விண்மீன் திரள் பால்வெளித் திரள் ஆகும். இதன் விட்டம் 1,00,000 ஒளி ஆண்டுகள் ஆகும். இது 100 பில்லியன் நட்சத்திரங்களைக் கொண்டிருப்பதாகக் கருதப்படுகிறது.

நமது சூரிய மண்டலம் விண்மீன் மையத்திலிருந்து சுமார் 27,000 ஒளி ஆண்டுகள் தொலைவில் பால்வழித்திரளின் கரத்தில் அமைந்துள்ளது. சூரிய மண்டலம் சராசரியாக 8,28,000 கி.மீ./மணி வேகத்தில் பயணித்தாலும், பால்வழித்திரளை முழுமையாகச் சுற்றிவர சுமார் 230 மில்லியன் ஆண்டுகள் ஆகும்.

நமது பால்வளித்திரளுக்கு அருகில் இருக்கும் விண்மீன் திரள் ஆண்ட்ரோமெடா ஆகும். நமது விண்மீன் திரளின் மையத்தில் சூரியனைப் போல் பில்லியன் மடங்கு அதிக நிறையுடைய ஒரு கருந்துளை காணப்படுகிறது.

வானியல் அளவீடுகள்

அளவு	விளக்கம்	மதிப்பு
வானியல் அலகு (வா.ஆ)	பூமிக்கும் சூரியனுக்கும் இடையிலான சராசரி தூரம்	1.496 × 10⁸ கி.மீ
ஒளி ஆண்டு (ஒ.ஆ)	ஒளியானது ஒரு வருடத்தில் கடந்த தூரம்	9.4607 × 10¹² கி.மீ
விண்ணியல் ஆரம் (pc)	ஒரு ஆர வினாடியில் ஏற்படுத்தும் கோணத்தின் தொலைவு	3.2615 ஒ.ஆ = 3.09 × 10¹³ கி.மீ

விண்மீன் மண்டலம்

பூமியில் இருந்து பார்க்கும்போது இரவு வானத்தில் காணப்படும் பிரித்தறியக்கூடிய நட்சத்திரங்களின் அமைப்பு விண்மீன் மண்டலம் என அழைக்கப்படுகிறது. சர்வதேச வானியல் சங்கம் 88 விண்மீன் மண்டலங்களை வகைப்படுத்தியுள்ளது.

இந்தியப் பெயர்	ஆங்கிலப் பெயர்
மேஷம்	Aries
ரிஷபம்	Taurus
மிதுனம்	Gemini
கடகம்	Cancer
சிம்மம்	Leo
கன்னி	Virgo
துலாம்	Libra
விருட்சிகம்	Scorpio
தனுசு	Sagittarius
மகரம்	Capricorn
கும்பம்	Aquarius
மீனம்	Pisces

நட்சத்திரங்கள்

நட்சத்திரங்கள் ஒளிரக்கூடிய ஆற்றலை வெளிப்படுத்தும் ஓர் ஒளிரும் வானியல் பொருளாகும். வெற்றுக் கண்களால் இரவு வானத்தில் ஏறக்குறைய 3000 நட்சத்திரங்களை நாம் பார்க்க முடியும். நட்சத்திரங்கள் மின்னுவதாகத் தோன்றுவதற்குக் காரணம், அவற்றின் ஒளி வளிமண்டலத்தில் ஏற்படும் தடைகளால் நேரான பாதையில் செல்ல அனுமதிக்கப்படாமல் போவதே ஆகும்.

பூமிக்கு மிக அருகில் உள்ள நட்சத்திரம் சூரியன் ஆகும். அடுத்த நட்சத்திரம் ஆல்ஃபா சென்டாரி ஆகும்.

துணைக்கோள்கள்

ஒரு கோளைச் சுற்றி நிலையான வட்டப்பாதையில் சுற்றும் பொருள் துணைக்கோள் என்று அழைக்கப்படுகிறது. துணைக்கோள்கள் இரண்டு வகைப்படும்: இயற்கை செயற்கைக்கோள்கள் மற்றும் செயற்கைத் துணைக்கோள்கள்.

புதன் மற்றும் வெள்ளி தவிர மற்ற எல்லா கோள்களும் நிலவுகளைக் கொண்டிருக்கும். பூமிக்கு ஒரே ஒரு நிலவு உள்ளது; வியாழன் மற்றும் சனி 60க்கும் மேற்பட்ட நிலவுகளைக் கொண்டுள்ளன.

இந்திய விண்வெளி ஆராய்ச்சி நிறுவனம் (இஸ்ரோ)

இந்திய விண்வெளி ஆராய்ச்சி நிறுவனம் (ISRO) பெங்களூருவை தலைமையிடமாகக் கொண்ட இந்திய அரசாங்கத்தின் விண்வெளி நிறுவனம் ஆகும். இது 1962ஆம் ஆண்டு விஞ்ஞானி விக்ரம் சாராபாயால் வடிவமைக்கப்பட்டு 1969இல் இஸ்ரோவாக நிறுவனமயமானது.

துணைக்கோள் / வாகனம்	சாதனை	ஆண்டு
ஆர்யபட்டா	இந்தியாவின் முதல் செயற்கைக்கோள்	1975
SLV-3 / ரோகினி	இந்தியாவால் உருவாக்கப்பட்ட முதல் ஏவு வாகனம்	1980
சந்த்ரயான்-1	சந்திரனைச் சுற்றும் துணைக்கோள்	2008
மங்கள்யான்	முதல் முயற்சியிலேயே செவ்வாயை அடைந்த நாடு	2013–2014
PSLV-C37	ஒரே ஏவுகணையில் 104 துணைக்கோள்கள் – உலக சாதனை	2017
சந்த்ரயான்-2	சந்திரனுக்கு GSLV-Mk III மூலம் ஏவப்பட்டது	2019