மனித உறுப்பு மண்டலங்கள்

6.1 எலும்பு மண்டலம்

எலும்பு மண்டலமானது எலும்புகள், குருத்தெலும்புகள் மற்றும் மூட்டுகளால் ஆக்கப்பட்டுள்ளது. மனிதனின் எலும்பு மண்டலம் 206 எலும்புகளை உடையது. இணைப்பு இழைகள் எலும்புகளை எலும்புகளுடன் இணைக்கின்றன; தசைநார்கள் எலும்புகளை தசைகளுடன் இணைக்கின்றன. எலும்பு மண்டலம் இரண்டு பிரிவுகளைக் கொண்டது — அச்சுச் சட்டகம் மற்றும் இணையுறுப்புச் சட்டகம்.

அச்சுச் சட்டகம்	இணையுறுப்புச் சட்டகம்
மண்டையோடு	மார்பு வளையம்
முதுகெலும்புத் தொடர் (தண்டுவடம்)	இடுப்பு வளையம்
விலா எலும்புக் கூடு (12 இணை)	கை – கால் எலும்புகள்

மண்டையோட்டில் மண்டை ஓட்டு எலும்புகள் மற்றும் முக எலும்புகள் உள்ளன. இவை மூளை மற்றும் முகத்தின் உள்ளமைப்பைப் பாதுகாக்கின்றன. உடலில் மிகச்சிறிய எலும்பு — உள்காதில் உள்ள அங்கவடி (Stapes) எலும்பு (நீளம் 2.8 மி.மீ). மிக நீளமான எலும்பு — தொடை எலும்பு. குழந்தைகள் பிறக்கும்போது 300-க்கும் அதிகமான எலும்புகளுடன் பிறக்கின்றன; வளர்ச்சியடையும்போது 206 ஆகின்றன.

6.2 தசை மண்டலம்

தசை மண்டலம் எலும்பு மண்டலம் மற்றும் நரம்பு மண்டலத்துடன் சேர்ந்து உடலசைவிற்கு உதவுகிறது. தசைகள் சுருங்கி விரியும் தன்மை கொண்டவை. உடலில் மூன்று வகை தசைகள் உள்ளன.

தசை வகை	அமைவிடம்	கட்டுப்பாடு	எடுத்துக்காட்டு
எலும்புத் தசைகள்	எலும்புகளுடன் இணைந்தவை	நம் விருப்பப்படி இயக்கலாம் (இயக்குதசை)	கைகளில் உள்ள தசைகள்
மென் தசைகள்	உணவுக்குழல், சிறுநீர்ப்பை, தமனிகள்	கட்டுப்படாத இயங்கு தசைகள்	இரைப்பை சுவர் தசை
இதயத் தசைகள்	இதயத்தின் சுவர்	கட்டுப்படாத இயங்கு தசைகள்	இதயத்துடிப்பை ஏற்படுத்துவது

முன்னங்கையை மேலும் கீழும் அசைவிக்க இருதலைத் தசை மற்றும் முத்தலைத் தசை என இரு வகைத் தசைகள் தேவைப்படுகின்றன. ஒரு தசை சுருங்கும்போது மற்றொன்று விரிவடைகிறது.

6.3 செரிமான மண்டலம்

செரிமான மண்டலமானது சிக்கலான உணவுப் பொருட்களை எளிய மூலக்கூறுகளாக மாற்றி செரிக்கப்பட்ட உணவை உட்கிரகிக்கிறது. உணவுக் குழாய் சுமார் 9 மீட்டர் நீளம் கொண்ட தசையாலான நீண்ட குழல். இரைப்பை செரிமானத்தின் பிரதான உறுப்பு; சிறுகுடலில் உட்கிரகித்தல் நடைபெறுகிறது.

வ.எண்	உணவுப் பாதையின் பாகங்கள்
1	வாய்
2	வாய்க்குழி
3	தொண்டை
4	உணவுக் குழல்
5	இரைப்பை
6	சிறுகுடல்
7	பெருங்குடல்
8	மல வாய்

உணவுக்குழாயுடன் தொடர்புடைய செரிமான சுரப்பிகள்: உமிழ்நீர் சுரப்பிகள், கல்லீரல், கணையம் ஆகியவை செரிமான நொதிகளைச் சுரக்கின்றன.

6.4 சுவாச மண்டலம்

சுவாச வாயுக்களின் பரிமாற்றம் மற்றும் சுவாசித்தல் நிகழ்ச்சியில் ஈடுபட்டுள்ள மண்டலம் சுவாச மண்டலம் ஆகும். இதில் நாசித்துளைகள், நாசிக்குழி, தொண்டை, குரல்வளை, மூச்சுக்குழல், கிளை மூச்சுக்குழல் மற்றும் நுரையீரல்கள் அடங்கும். குரல் வளைமூடி (எப்பிகிளாட்டிஸ்) சுவாசப்பாதைக்குள் உணவு செல்வதைத் தடுக்கிறது.

நுரையீரல்கள் மார்பறையினுள் அமைந்துள்ளன. மனிதனின் ஒவ்வொரு நுரையீரலிலும் ஏறக்குறைய 300 மில்லியன் நுண் காற்றுப்பைகள் (ஆல்விஓலை) உள்ளன. நுரையீரல்களைச் சுற்றியுள்ள பாதுகாப்பு படலத்திற்கு ப்ளூரா (Pleura) என்று பெயர்.

சுவாச வகை	விளக்கம்
வெளிசுவாசம்	நாசித்துவாரங்கள் வழியாக O₂ உள்ளிழுக்கப்பட்டு, CO₂ வெளிவிடப்படுகிறது
உட்சுவாசம்	இரத்த ஓட்ட மண்டலம் வழியாக O₂ உடல் முழுவதும் அளிக்கப்படுகிறது; ஹீமோகுளோபினால் கடத்தப்படுகிறது
செல்சுவாசம்	செல்கள் O₂ எடுத்து CO₂ வெளிவிடுகின்றன

6.5 இரத்த ஓட்ட மண்டலம்

இரத்த ஓட்ட மண்டலம் இதயம், இரத்தக் குழாய்கள், இரத்தம் ஆகியவற்றை உள்ளடக்கியது. இது சுவாச வாயுக்கள், உணவுச் சத்துப் பொருள்கள், ஹார்மோன்கள், கழிவுப் பொருள்கள் போன்றவற்றைக் கடத்துகிறது; உடல் வெப்பநிலையை ஒரே சீராக வைக்கிறது.

இதயம் மார்பறையில் இரண்டு நுரையீரல்களுக்கும் இடையே அமைந்துள்ளது. இதயம் நான்கு அறைகளைக் கொண்டது. ஓய்வு நிலையில் ஒரு மனிதனின் சராசரி நாடித்துடிப்பு ஒரு நிமிடத்தில் 72 – 80 ஆக இருக்கும்.

இரத்தக் குழாய் வகை	நிறம்	பணி
தமனிகள்	வெளிர் சிவப்பு	இதயத்திலிருந்து உடல் பாகங்களுக்கு இரத்தம் எடுத்துச் செல்கின்றன
சிரைகள்	கருஞ்சிவப்பு	உடல் பாகங்களிலிருந்து இதயத்திற்கு இரத்தம் கொண்டு வருகின்றன
தந்துகிகள்	—	மிகவும் குறுகலான நாளங்கள்; தமனிகள் – சிரைகளை இணைக்கின்றன

இரத்தம் ஒரு திரவ இணைப்புத் திசு. இரத்த அணுக்கள் மூன்று வகை: சிவப்பணுக்கள் (RBCs), வெள்ளை அணுக்கள் (WBCs), இரத்தத் தட்டுகள் (Platelets). இரத்த சிவப்பணுக்கள் எலும்பு மஜ்ஜையில் உருவாக்கப்படுகின்றன.

6.6 நரம்பு மண்டலம்

நரம்பு மண்டலம் நியூரான்கள் (நரம்பு செல்கள்) ஆல் ஆனது. இம்மண்டலத்தில் மூளை, தண்டுவடம், உணர்ச்சி உறுப்புகள், நரம்புகள் உள்ளன. மூளையானது உடலின் மத்தியக் கட்டுப்பாட்டு மையம். மூளையை மூன்று பகுதிகளாகப் பிரிக்கலாம்: முன் மூளை, நடு மூளை, பின் மூளை. மூளையை மூடியுள்ள மூன்று உறைகளுக்கு மூளை உறைகள் (Meninges) என்று பெயர்.

தண்டுவடம் முதுகெலும்புத் தொடரினால் மூடப்பட்டிருக்கிறது. நரம்பு மண்டலத்தின் முக்கியப் பணிகள்: உணர்ச்சி உள்ளீடு, ஒருங்கிணைப்பு, செயல் வெளிப்பாடு.

6.7 உணர் உறுப்புகள்

நமது உடலில் ஐந்து உணர் உறுப்புகள் உள்ளன: கண்கள், காதுகள், மூக்கு, நாக்கு, தோல். இவை நம்மை சுற்றியுள்ள உலகை உணரவும் விழிப்புணர்வை ஏற்படுத்தவும் உதவுகின்றன.

உணர் உறுப்பு	பணி	முக்கிய அமைப்பு
கண்கள்	பார்த்தல்	கார்னியா, ஐரிஸ், கண்மணி (பியூப்பில்)
செவிகள்	கேட்டல் மற்றும் சமநிலை	புறச்செவி, நடுச்செவி, உட்செவி
மூக்கு	நுகர்தல்	நாசிக்குழி
நாக்கு	சுவைத்தல்	சுவை அரும்புகள்
தோல்	உணர்தல் (வெப்பம், குளிர், அழுத்தம்)	புறப்படலம், அகப்படலம், உட்படலம்

தோல் மூன்று அடுக்குகளைக் கொண்டது: புறப்படலம், அகப்படலம், உட்படலம். தோல் சூரியஒளியைப் பயன்படுத்தி வைட்டமின் D உற்பத்தி செய்கிறது.

6.8 நாளமில்லாச் சுரப்பி மண்டலம்

நாளமில்லாச் சுரப்பி மண்டலம் உடல் செயல்களை ஒழுங்குபடுத்தி உட்புற சூழலைப் பராமரிக்கிறது. இச்சுரப்பிகள் ஹார்மோன்கள் என்னும் வேதிப் பொருட்களை உற்பத்தி செய்கின்றன.

நாளமில்லா சுரப்பி	இருப்பிடம்
பிட்யூட்டரி சுரப்பி	மூளையின் அடிப்பகுதி
பீனியல் சுரப்பி	மூளையின் அடிப்பகுதி
தைராய்டு சுரப்பி	கழுத்து
தைமஸ் சுரப்பி	மார்புக்கூடு
கணையம்	வயிற்றின் அடிப்பகுதி
அட்ரினல் சுரப்பி	சிறு நீரகத்தின் மேல்

6.9 கழிவு நீக்க மண்டலம்

நமது உடலிலிருந்து நைட்ரஜன் கலந்த கழிவுகளை வெளியேற்றுவது கழிவு நீக்க மண்டலம். இதில் சிறுநீரகங்கள், சிறுநீர் நாளங்கள், சிறுநீர்ப்பை, சிறுநீர்ப் புறவழி (யூரித்ரா) ஆகியவை அடங்கும். நெஃப்ரான்கள் சிறுநீரகத்தின் செயல் அடிப்படை அலகுகள்; இவை இரத்தத்தை வடிகட்டி சிறுநீரை உருவாக்குகின்றன. நமது உடலில் 70% நீர் உள்ளது; ஒரு நாளைக்கு 1.5 – 3.5 லிட்டர் நீர் அருந்த வேண்டும்.