சமய இலக்கியங்கள்

பக்தி இலக்கியங்களின் தோற்றம்

• பக்தி இலக்கிய காலத்தில் இயற்றமிழ்ப் பாடல்கள் பண்ணோடு இயைந்து இசைத்தமிழ் பாடல்களாக மாறியுள்ளன
• வடமொழிச் சொற்களும் தமிழுடன் இணைந்து புதிய மரபு தோன்றியது
• இந்த எழுச்சிக்கு ஆதரவளித்த பல்லவர் ஆட்சிக்காலம் பக்தி இலக்கியத்தின் மறுமலர்ச்சிக்காலம் எனப்படுகிறது
• நாயன்மார்களும், ஆழ்வார்களும் தோன்றி "உலக இன்பங்களைத் துய்த்தவாறே இறைவனிடத்தில் பக்தி செலுத்தலாம். இறைவன் அன்பின் வடிவானவன். அன்பு ஒன்றே அவனை அடையும் வழி" என்று இல்லறத்திற்கு முதன்மை கொடுத்தனர்
• இறைவனை ஆண்டான், தந்தை, தோழன், நாயகன் என பல பரிமாணங்களில் கண்டு போற்றினர்
• இவற்றையே தாச, சற்புத்திர, சக, ஞான மார்க்கங்கள் என்று குறிப்பிடுகின்றனர்

பக்தி நெறிகள் மற்றும் பின்பற்றியவர்கள்

நெறி	பின்பற்றியவர்கள்
அடிமை நெறி (தாச மார்க்கம்)	திருநாவுக்கரசர், குலசேகராழ்வார், தொண்டரடிப் பொடியாழ்வார்
பிள்ளைமை நெறி (சற்புத்திர மார்க்கம்)	திருஞானசம்பந்தர்
தோழமை நெறி (சக மார்க்கம்)	சுந்தரர், திருமழிமிசையாழ்வார்
நாயகன்-நாயகி நெறி (ஞான மார்க்கம்)	மாணிக்கவாசகர், திருமங்கையாழ்வார்

• பெரியாழ்வார் - இறைவனை குழந்தையாகக் கருதி தாலாட்டு பாடல்கள் பல பாடியுள்ளார்
• ஆண்டாள் - பெரியாழ்வாரின் வளர்ப்பு மகள், இறைவனையே தன் தலைவனாக பாவித்து வாழ்ந்தாள்
• சிவனைத் தலைவனாக கொண்ட 27 அடியார்கள் பாடிய பதிகங்கள் பன்னிரு திருமுறைகள்
• திருமாலைத் தலைவனாக கொண்ட 12 ஆழ்வார்கள் பாடிய பாசுரங்கள் நாலாயிரத் திவ்ய பிரபந்தம்
• முகலாயப் படையெடுப்பின் காரணமாக தமிழகத்தில் இசுலாம் பரவியது
• இசுலாமியக் கவிஞர்கள் தமிழ்மரபினைப் பின்பற்றி இறைவனையும், இறைவனின் திருத்தூதரான நபிகள் நாயகத்தையும் போற்றிப் பரவினர்

பன்னிரு திருமுறைகள்

திருமுறை	நூல்கள்	ஆசிரியர்கள்
முதல், இரண்டாம், மூன்றாம்	தேவாரம்	திருஞானசம்பந்தர்
நான்காம், ஐந்தாம், ஆறாம்	தேவாரம்	திருநாவுக்கரசர்
ஏழாம்	தேவாரம்	சுந்தரர்
எட்டாம்	திருவாசகம், திருக்கோவையார்	மாணிக்கவாசகர்
ஒன்பதாம்	திருவிசைப்பா, திருப்பல்லாண்டு	திருமாளிகைத்தேவர் உள்ளிட்ட 9 பேர்
பத்தாம்	திருமந்திரம்	திருமூலர்
பதினோராம்	40 நூல்களின் தொகுப்பு	காரைக்கால் அம்மையார் உள்ளிட்ட 12 பேர்
பன்னிரண்டாம்	திருத்தொண்டர்புராணம் (பெரியபுராணம்)	சேக்கிழார்

சைவம்

திருநாவுக்கரசர் சிவபெருமானிடம் இப்பிறப்பு மட்டுமல்லாமல் எப்பிறப்பிலும் உனக்கு நான் அடிமை. நின் திருநாமமே எனது படைக்கலம் எனக் குறிப்பிடுகிறார்:

படைக்கல மாகவுன் நாமத் தெழுத்தஞ்சுஎன் நாவிற்கொண்டேன்
இடைக்கல மல்லேன்; எழுபிறப்பும் உனக்காட் செய்கின்றேன்
துடைக்கினும் போகேன்; தொழுது வணங்கித் தூநீறணிந்துன்
அடைக்கலங் கண்டாய் அணிதில்லைச் சிற்றம் பலத்தரனே!

வைணவம்

நாராயணனாகிய திருமாலின் பெயரை அன்போடு உச்சரிப்பதால் அடியவர்கள் எய்தும் நன்மையை பூதத்தாழ்வார் பாடலால் உணர்த்துகிறார்:

ஞானத்தால் நன்குணர்ந்து நாரணன்றன் நாமங்கள்
தானத்தால் மற்றவன் பேர் சாற்றினால் - வானத்
தணியமர ராக்குவிக்கு மஃதன்றே நாங்கள்
பணியமரர் கோமான் பரிசு

பன்னிரு ஆழ்வார்கள் மற்றும் அவர்களின் நூல்கள்

ஆழ்வார்	நூல்கள்
பொய்கையாழ்வார்	முதல் திருவந்தாதி
பூதத்தாழ்வார்	இரண்டாம் திருவந்தாதி
பேயாழ்வார்	மூன்றாம் திருவந்தாதி
திருமழிமிசையாழ்வார்	நான்காம் திருவந்தாதி, திருச்சந்த விருத்தம்
நம்மாழ்வார்	திருவிருத்தம், திருவாசிரியம், பெரிய திருவந்தாதி, திருவாய்மொழி
குலசேகராழ்வார்	பெருமாள் திருமொழி
தொண்டரடிப் பொடியாழ்வார்	திருமலை, திருப்பள்ளியெழுச்சி
பெரியாழ்வார்	திருப்பல்லாண்டு, பெரியாழ்வார் திருமொழி
ஆண்டாள் நாச்சியார்	திருமொழி, திருப்பாவை
திருப்பாணாழ்வார்	திருப்பதிகம்
திருமங்கையாழ்வார்	பெரிய திருமொழி, திருக்குறுந்தாண்டகம், திருநெடுந்தாண்டகம், திருவெழு கூற்றிருக்கை, சிறிய திருமடல், பெரிய திருமடல்
மதுரகவியாழ்வார்	திருப்பதிகம்

சமணம்

அனைத்து விதமான சிறந்த குணங்களையும் தெய்வமென கொண்டு, மூவுலகும் போற்ற அழிவற்ற இன்பம் நல்கும் தேவாதி தேவனின் திருவடியைப் போற்றுவோம் என்று சமண சமயக் காப்பியமான சீவக சிந்தாமணியில் திருத்தக்கதேவர் குறிப்பிடுகின்றார்:

மூவா முதலா உலகம்ஒரு மூன்றும் ஏத்தத்
தாவாத இன்பம் தலை யாயது தன்னின் எய்தி
ஓவாது நின்ற குணத்தொண்ணிதிச் செல்வனென்ப
தேவாதி தேவன் அவன் சேவடி சேர்தும் அன்றே!

பெளத்தம்

• மணிமேகலை பெளத்த சமயக் கருத்துகளை பரப்பும் சிறந்ததோர் நூலாக விளங்குகிறது
• இது காமம், வெகுளி, மயக்கம் என்னும் மூன்று குற்றங்களையும் நீக்கும் தூய அறிவுமிக்க நூலை அருளிய புத்தரைப் போற்றுகிறது

இசுலாம்

சீறாப்புராணத்தில் உமறுப்புலவர் முகம்மது நபிகளின் அருளில் ஆட்பட்டு பக்திமை தோன்ற வியந்து போற்றுகின்றார்.

கிறித்துவம்

• இயேசு பெருமான் மனிதகுலத்தின் உயர்வுக்காக உயிர் நீத்த திருச்சிலுவை, கிறித்துவ நம்பிக்கைக்கு அடிப்படையாக விளங்குகிறது
• சிலுவையில் அறையப்பட்ட போதும் பகைவர்க்கு அருளிய இயேசுவே உலக இரட்சகர்
• இதற்கு வேறு சான்றுகள் வேண்டுமோ? என அன்பு மேலிடும் இரட்சணிய யாத்திரிகப் பாடல் வழியே எச்.ஏ.கிருட்டிணப்பிள்ளை வினவுகிறார்